“Protokollarda Qarabağla bağlı heç bir şərt irəli sürülməyib”

“Dağlıq Qarabağ münaqişəsini həll etmək üçün Azərbaycan və Ermənistan prezidentləri danışıqlar aparır. Hesab edirəm ki, biz pozitiv nəticələr əldə edəcəyik”.

APA-nın xəbərinə görə, bu açıqlamanı jurnalistlərə QDİƏT Xarici İşlər Nazirləri Şurasının 21-ci iclasına qatılmaq üçün Bakıya gələn Ermənistan xarici işlər nazirinin müavini Arman Kirakosyan verib. “Türkiyə ilə Ermənistan arasında aparılan danışıqların Dağlıq Qarabağ probleminin həllinə təsiri varmı?” sualına cavab olaraq nazir müavini bunları deyib: “Yox, leqal planda bu danışıqların həmin məsələ ilə bağlılığı yoxdur. İmzalanan protokollarda Qarabağla bağlı heç bir şərt irəli sürülməyib. Türkiyə ilə Ermənistan arasında iki protokol imzalanıb. Bu protokollar parlamentdə ratifikasiya olunsa, o zaman iki aydan sonra sərhədlər açılacaq. Üç ay sonra iki ölkənin hökumətlərarası komissiyası yaradılacaq”.